LAOAG CITY – Kalikagum ni Atty. Charito Malicad, City Tourism Officer nga ad-adda pay a maital-o ken mabiag dagiti bukud a produkto dagiti umili ditoy siudad ti Laoag.
Segun kenkuana, naruay dagiti umili ditoy siudad ti agar-aramid kadagiti bukudda a produkto kas ti basi, suka, chips ken candies ken dagiti sinam-it a makmakan.
Inbatadna a dagitoy dagiti maysa kadagiti planona a padur-asen kas katugtugaw a baro a City Tourism Officer tapno ad-adda pay a mabigbig dagiti produkto dagiti umili.
Inlawlawagna a napintas no adda dagiti programa a maaramid para kadakuada tapno ditoy a maitampok dagiti nagduduma a produkto ditoy siudad.
Innayonna a manamnama nga adda ti maiyuswat a panagtataripnong ti lokal a gobierno ditoy siudad ti Laoag ken ti Department of Trade and Industry tapno maplano a naimbag daytoy.
