LAOAG CITY – Nagsaritan ni Miss Universe 2018 Catriona Gray maipanggep iti panagsina da ken ni Sam Milby.
Inbatad ni Catriona a kalpasan ti uppat a tawen a relasyon da, nautub ni Sam a saan pay a nakasagana iti commitment kalpasan a nag-propose kenkuana.
Inadmitir ni Catriona a nasaktan unay iti inaramid ni Sam ken ginandat na paylaeng nga urnusen ti relasyon da iti actor ken nakasagana koma pay nga ag-adjust, ngem iti saan a nagbayag ket nagdesisyon met laeng a pilyen na laengen ti bukodna a bagi.
Innayon na a saan laeng a naminsan wenno namindua a daras a ginandat na nga urnusen ken inbaba na ti bagina tapno maurnus koma pay ti relasyon da ken ni Sam.
Inkalintegan na a saanna nga inkonsiderar a pakaibabaanna ti inaramid na gapu ta inaramid na laeng dagitoy para iti tao a napateg kenkuana.
Iti baet ti panagsinan dagiti dua, kinumpirmaran ni Catriona nga agkitkita da paylaeng ken ni Sam iti management events ken nagtalinaed da a civil.
Kuna pay ni Catriona nga ado ti napidot na nga adal manipod iti saan a napintas a nagbanagan ti relasyon da ken ni Sam.
Inpakaammo ti balasang a sumaysayaaten ti kondisyon na kalpasan a dimmalan iti therapy ti dua a tawen.
Nagtalinaed met a positibo ni Catriona no maipapan iti ayat ken inrakurak na nga addan ti kade-date na iti ruwar ti showbiz.
Maipalagip nga inrakurak da Sam ken Catriona ti relasyon da idi 2020 ken na-engaged dagitoy idi 2023 idinto nga iti laeng napalabas a tawen ket inwaragawag ti actor a nagsina dan iti beauty queen.
