LAOAG CITY – Nangisayangkat ti China ti maysa a missile test-fire manipod iti nuclear-powered submarine da agturong iti Pacific Ocean.
Naruay met dagiti nangbabalaw iti nagbalin nga addang ti China ken panagamak manipod kadagiti kaparanget a pagilian kas ti Japan, Australia, ken New Zealand.
Naalarma dagiti nadakamat a pagilian iti agtultuloy a panangpalawa ti military ti China iti rehiyon.
Naiyuswat ti missile babaen ti People’s Liberation Army Navy (PLAN) usar ti maysa a nuclear submarine.
Naglaon ti missile ti maysa a dummy warhead ken bimmagsak daytoy iti international waters iti Pasipiko a nairanta kas designated area.
Basar iti report, ti missile launch ti China ket maysa a routine arrangement laeng para iti tinawen a military training.
Inlawlawag met ti gobierno da a ti panagsanay ket saan a nakadirekta iti aniaman a pagilian wenno partikular a target.
Naipatungpal ti missile test sumagmamano nga oras laeng kalpasan a nagpirma ti Australia ken Fiji iti maysa a baro a defense alliance.
Iti babaen ti katulagan, nagkari ti dua a pagilian nga agtinnulong ken suportaran da iti tunggal maysa no maaddaan ti aniaman a pangta wenno panagatake.
