LAOAG CITY – Inpakaammo ni Dr. Rodrigo Catcatan, ti mangidadaulo ti City Health Office ditoy ciudad ti Laoag nga addan ti tallo nga indibidual a nairekord ti opisina da a positibo iti Human Immunodeficiency Virus.
Segun kenkuana, nairekord ti nasao a bilang sipud idi Enero agingga ti Setyembre ita tawen.
Inbatad na nga iti kallabes ket adda ti dimmalan iti Human Immunodeficiency Virus screening iti opisina da ken positibo ti resulta na.
Inpakaammo na a ti nasao nga indibidual ket insigida a naikabil iti Mariano Marcos Memorial Hospital and Medical Center iti ciudad ti Batac para iti naan-anay a pannakaipadalan na iti confirmatory test.
Mainaig iti daytoy, nagpanawagan ni Dr. Catcatan kadagiti addaan ti sakit nga Human Immunodeficiency Virus a saan da nga agdudua ken agbuteng nga agpataming gapu ta libre ti maipaay kadakuada nga agas ken confidential ti kinatao da.
Kabayatanna, agtultuloy ti pannakibinulig ti City Health Offfice iti Mariano Marcos Memorial Hospital para iti Information Education Campaign mainaig iti nasao a sakit tapno maballaagan ti publiko no kasano a maala, malapdan ken maitrato a normal dagiti tao a positibo iti Human Immunodeficiency Virus.
