LAOAG CITY – Kalikagum ti City Government ditoy siudad ti Laoag ti pannakaipalawa dagiti pagmulaan ti tabako ditoy siudad.
Segun ken ni Mayor James Bryan Alcid, daytoy ket tapno dumakkel ti mapastrek ti Republic Act No. 7171 wenno ti virginia-type cigarettes.
Inbatadna nga iti kallabes ket adda ti panagtataripnongda ti City Agriculture Office ditoy siudad ti Laoag a maysa kadagiti nagbalin nga assessment-da ti pannakaipalawa dagiti pagmulaan ti tabako.
Inlawlawagna a basar iti City Agriculture Office a dagiti sumagmamano a daga ditoy siudad ket saan a mabalin a mulaan ti tabako gapu ta nadadael dagitoy iti panagusar ti bunubon.
Kunana a maysa kadagitoy dagiti kalikagumda a maplastar gapu ta no adu dagiti agmula ti tabako ket adu met ti mapastrek iti Republic Act No. 7171 ken ad-adu dagiti benepisio a maipaay kadagiti mannalon ditoy siudad.
Mainaig iti daytoy, inpakaammo ni Alcid a no aniaman dagiti napintas a narugianan a naaramidan ket maitultuloy dagitoy para iti ad-adda a pagdur-asan ditoy siudad ti Laoag.
Kabayatanna, immunan nga inrakurak ni Engr. Shiela Opelac, mangidadaulo ti City Agriculture Office a dumanon iti 20 nga ektaria ti namulaan ti tabako ditoy siudad.
Innayonna nga addan ti 20 a barangay ti agmulmula ti tabako ditoy siudad pakairamanan iti Barangay Bacsil North, Bacsil South, Dibua North, Dibua South, Lataag, Bengcag, Zamboanga, San Lorenzo ken dadduma pay.
