LAOAG CITY – Inpasingked ni Ms. Angel Lao, mangidadaulo ti City Tourism Office nga aramidendan ti Tourism Code ditoy siudad ti Laoag kalpasan a nalpasen a nakaaramid ti Provincial Tourism Office ti bukudda a Tourism Code iti napalabas a lawas.
Segun kenkuana, kalikagumda a maileppas ti Tourism Code ditoy siudad ti Laoag sakbay nga agngudo ti agdama a tawen kagiddan pay ti panangiplastarda ti Tourism Development Plan.
Inbatadna a ti kangrunaan a nailanad iti Tourism Code ket ti pannakaipasigurado a napintas ti pannakaipadanon ti serbisio iti benneg ti turismo kadagiti bisita ken turista.
Inlawlawagna a gagem ti opisinada nga adda ti maipasdek ti komunidad ti bukudda a tourist attraction nga ad-adda pay a makagutigot kadagiti turista nga agpasiar ditoy siudad.
Innayonna a babaen iti nasao nga addang ti pangopisinaanda ket dakkel ti posibilidad a ngumato wenno umadu ti bilang dagiti turista nga agturong ditoy siudad ti Laoag.
