LAOAG CITY – Inawagan ni Atty. Charito Malicad, City Tourism Officer ditoy siudad ti Laoag ni Mr. Aianree Raquel, Provincial Tourism Officer a “too irresponsible” wenno iresponsable iti nagbalin a komentona seknan iti maipagarup a binabay-an ti lokal a gobierno dagiti nagkaiwarang a basura a nabati iti sangoanan ti Kapitolio Probinsial kalpasan ti naisayangkat a Panagyaman Concert ken Grand Opening Parade kas paset iti panangrambak ti umuna nga aldaw ti Pamulinawen Festival.
Segun ken ni Atty. Malicad, nalpas ti parada agarup alas siete ti rabii idi Pebrero 1 gapu ta dimmanon iti agarup 80 a ribu ti nakipaset iti Grand Opening Parade.
Inbatadna a nangrugi met ti agarup alas otso ti rabii iti kapada nga aldaw ti Panagyaman Concert babaen kadagiti inimbitaranda a celebrity artists ken performers no sadinno a nalpas daytoy iti agarup ala una ti parbangon idi Pebrero 2.
Inlawlawag ni Atty. Malicad nga agarup alas tres ti parbangon idi Pebrero 2 ket dagus a rinugianen dagiti street sweepers manipud iti lokal a gobierno ditoy siudad ti Laoag ti agdalos iti aglawlaw a nakaisayangkatan ti programa.
Nupay kasta, kunana nga inyun-unada a dalosan ti Rizal Street pakairamanan iti paset ti Aurora Park tapno maliklikan ti panagirot ti trapiko gapu ta adu ti dumalyasat a lugan pakairamanan dagiti tattao.
Mainaig iti daytoy, inpakaammo ni Ms. Elmar, maysa kadagiti street sweepers ditoy siudad ti Laoag a nagdalosda iti Capitol premises kaduana ti maysa kadagiti Provincial Security Guard ti Kapitolio Probinsial.
Kabayatanna, inpetteng ti City Tourism Officer a dagiti street sweepers ditoy siudad ti Laoag ti nagdalos iti kaudian a Parada Ar-aria nga inorganisar ti gobierno probinsial banag nga awan met dagiti negatibo a dinakdakamatda maipanggep iti daytoy.
Maipalagip a nag-post iti online ti Provincial Tourism Officer maipapan kadagiti nagkaiwarang a basura iti sangoanan ti Kapitolio Probinsial a maipagarup a saan a dagus a dinalosan ti lokal a gobierno.
