LAOAG CITY – In-flag ti Commission on Audit (COA) ti Department of Health (DOH) gapu kadagiti deficiency iti pannakaipatungpal ti Health Facilities Enhancement Program (HFEP) nga agbalor iti P2.83 billion idi tawen 2023.
Iti tinawen nga audit report ti Department of Health, kinuna dagiti state auditors nga adda naitantan a completion/implementation, agraman dagiti saan a nausar nga imprastruktura ken saan a naipatungpal a proyekto iti sidong ti Health Facilities Enhancement Program nga agdagup iti P2,831,125,982.56.
Ti naaprobaran a badyet para idi 2023 Health Facilities Enhancement Program ket nangipaay iti pondo para iti pannakaipasdek, upgrading, ken expansion dagiti healthcare facilities, pakairamanan ditoy ti, panaggatang kadagiti alikamen ti ospital ken motor vehicles, pannakaipangpangruna dagiti proyekto a nakailanad iti Universal Healthcare Law ken iti Geographically Isolated and Disadvantaged Areas, kasta met ti upgrading kadagiti pasilidad para iti COVID-19 response.
Iti P2.83 bilion a dagup nga in-flag ti Commission on Audit, P2.44 bilion ti aggapu iti delayed completion/implementation dagiti infrastructure projects.
