LAOAG CITY –Inbatad ti Commission on Population and Development (CPD) a mangkitkita da kadagiti dadduma pay a pagannurutan a pakabenepisyaran dagiti senior citizens.
Segun ken ni Commission on Population and Development Executive Director Lisa Grace Bersales, adon dagiti napinpintas a benepisyo a maipapaay kadagiti senior citizens gapu iti Senior Citizens Act.
Nupay kasta, kuna ni Bersales a dagiti baro a pagannurutan iti digitalisasyon ket mabalin a pakabenepisyaran dagiti senior citizens.
Inlawlawag na a kasapulan a maikkan ti serbisyo a masursurwan dagiti senior citizens no kasanu da a maliklikan dagiti scammers ken no kasanu da a makasursuro nga ag-online gapu ta possible a dumteng ti panawen a ti gobierno ket naan-anay nga agbalin a paperless wenno contactless.
Inpakaammo ni Bersales a 5 a porsiento iti populasyon ti Pilipinas ket dagiti nataengan nga agtawen ti 65 agpangato.
Nababbaba daytoy no ikompara iti aging population idiay Japan ken Thailand.
