LAOAG CITY – Natay ti maysa a construction worker kalpasan ti maipagarup a pannakabugbog na babaen kadagiti innem a lallaki iti Brgy. Cavit ditoy siudad ti Laoag.
Ti biktima ket maysa a lalaki, agtawen ti 19, residente iti Brgy. 34-B ditoy siudad ngem stay-in construction worker iti Brgy. 16 iti ili ti Sarrat.
Dagiti suspek ket agtawen ti 44, mangalap, maysa nga agtawen ti 38 agpada a residente iti Brgy. 34B ditoy siudad idinto nga adda pay dagiti uppat a saan a nabigbig a suspek.
Basar iti imbestigasyon ti PNP Laoag, iturturong ti biktima ti maysa a tricycle nga agpapalaud a direksiyon ket maipagarup a sinaruno dagiti suspek a naglugan iti kurong-kurong ket dua a motorsiklo.
Idi napasardeng da ti biktima kalpasan a dinungpar da ti sidewheel tricycle ket dita a pinalawlawan da.
Kalpasan a nabugbog da ti biktima ket dagus a naglibas da a nagturong iti daya.
Mainaig iti daytoy, nabigbig ti ina ti biktima dagiti suspek rason nga adda ti dua a naipakustudyar iti PNP Laoag.
Nagpabigbig met dagiti dua a natiliw babaen iti pannakiuman ti Bombo Radyo Laoag kadakuada a dagitoy ket isuda Severino Jacinto kenni Ronald Jacinto agpada a residente iti Brgy. 34B ditoy siudad ken intudo ti ina ti biktima a karaman a nangdangran iti anak na.
Iti pannakiuman ti Bombo Radyo iti maysa nga Jacinto, naglikudan na a karaman iti pannakabugbog ti biktima gapu ta adda daytoy iti pagtaengan da idi rabii.
Inadmitir na met nga am-ammo na ti biktima ken maipagarup nga nagtaktakaw ti biktima kadagiti ikan na iti kallabes.
Inbatad na nga adda ti panagsasarita da iti kapitan ken adda ti katulagan a napirmaan iti kallabes.
Kuna ni Jacinto a nadadael dagiti fish cage na sumagmamano nga aldaw kalpasan a nagsasarita da iti barangay ken adda ti nakakita iti daytoy.
Inlawlawag na a kayat da a paayaban ti biktima iti barangay ngem saan a nagpakpakita.
Innayon ni Jacinto a naduktalan na a nagsangat ti biktima ti bukatot na kadua na ti asawa na ken ti anak na.
Binuya na lattan ti aramid ti biktima agingga a nakita na ti karga ti timba na ket ditan a nagpaayab ti tanod ken dadduma pay a nakakita iti insidente nga inadmitir met ti biktima.
Innayon ni Jacinto a naitudo da a karaman ti pannakapapatay ti biktima gapu ta isuda ti kangrunaan a mangirekreklamo iti barangay.
