LAOAG CITY – Natay ti maysa a construction worker kalpasan a nalmes iti karayan iti Barangay Pragata iti ili ti Pasuquin.
Segun ken ni Police Lt. Roi Manuel Ordonio, ti chief of police iti ili ti Pasuquin, ti biktima ket agtawen ti 52 ken residente iti Barangay Naglicuan iti met laeng nasao nga ili.
Inbaga na a napan ti biktima ken sumagmamano a kakadwa na iti karayan tapno agpipiknik ngem iti papan panagdigus ti construction worker ket ditoyen a nalmes.
Kuna ni Ordonio a maysa a mangngalap nga agkalkalap iti tengnga ti karayan ti nakakita iti biktima nga agpapaisalakan, ket dagus met a napan innala ti maseknan ken inlugan iti bangka na.
Innayon na nga inpadas da nga i-revived ti biktima ngem napaay da ken iti isasangpet dagiti kameng ti Rural Health Unit (RHU) ket indeklara dan a pimmusayen.
Inpakaammo pay ni Ordonio a positibo a nakainom ti arak ti biktima ken possible a mapan koma agpausaw idi napasamak ti insidente.
