LAOAG CITY – Nakitaripnong ni dati a Presidente Rodrigo Duterte kadagiti abugadona no kasano nga agsapata iti responsibilidad kas Mayor idiay siudad ti Davao.
Inbatad ni Vice President Sara Duterte, daytoy ti napagsaritaanda nga agama kalpasan a bimmisita isuna iti amana iti pagbaludan idiay The Hague, Netherlands.
Kunana a ti kiddaw laeng ti dati a Presidente ket waya-wayaan isuna gapu ta kalikagumna nga agsapata iti responsibilidadna.
Maipalagip a ni dati a Presidente Duterte ket nangabak iti napalabas a 2025 Midterm Elections kontra iti dati a Civil Service Commission chairman a ni Karlo Nograles.
Mamati ti Bise Presidente nga amin ket mangnamnama a mapagawiden ti dati a Presidente iti kabiitan a panawen gapu ta kasapulanda ti Mayor idiay siudad ti Davao.
