LAOAG CITY – Nairekord ti pakasaritaan iti Palarong Pambansa 2025 kalpasan ti naisangsangayan a panagballigi ti Davao Region iti tay-ak ti basketball para iti secondary boys.
Iti umuna a gundaway iti pakasaritaan, naiyawid ti koponan ti Davao ti kampeonato kalpasan nga inabakna ti Western Visayas iti iskor a 67-51.
Mangrugi pay laeng iti umuna a segundo ti laban ket agresibon ti Davao Region, insigida a nakaaramid ti dua a puntos.
Iti umuna a kuarter pay laeng iti iskor a 15-8. Nagtultuloy ti risiris a laban iti maikadua a kuarter ngem napagtalinaed latta ti Davao ti lamang iti iskor a 27-24.
Ad-adda nga immadayo ti lamang iti maikatlo a kuarter a nakagun-od ti 46-37 agingga a naan-anaydan a naala ti balligi iti maikapat a kuarter iti iskor a 67-51.
Maysa kadagiti nagbalin nga emosional kalpasan ti ay-ayam ket ni Sebastian Laroya, Team Captain ti Davao Region.
Segun kenkuana, ninamnamada ti nagbalin a resulta gapu iti nagbalin metten a naiget a panagsanayda iti inaldaw-aldaw.
Kunana a nagbalin a sulit dagiti amin a bannog ken sakripisioda iti panagballigida.
Kabayatanna, inpakaammo ni Mr. Jess Evangilio, Coach ti Davao Region ket napalaos ti panagyamanna ti nagbalin a resulta iti ay-ayamda.
Innayonna a tallo a tawen a sinaganaanda ti laban ken iti umuna a gundaway ken nakapartisipar ken nakagun-odda ti balligi iti Palarong Pambansa.
