LAOAG CITY – Inaprobaranen ni Department of Budget and Management (DBM) Secretary Amenah Pangandaman ti pannakaiparuk-at ti P1 bilyon a pundo para iti pannakaipasdek ti child development centers (CDC) kadagiti marigrigat wenno addaan ti nababa nga income a lokal a gobierno ditoy Pilipinas.
Segun iti sekretario, ti pannakairuar ti pundo ket kagiddan ti direktiba ni Presidente Ferdinand Marcos Jr. nga ipangpangruna ti edukasion ken human capital development.
Mamati ti sekretario a napateg ti pannakaipasdek kadagiti nasao a center iti intero a pagilian para iti pagsayaatan ti tunggal nga ubing a Pilipino.
Immuna iti daytoy, naisayangkat ti ceremonial signing ti Joint Circular iti pannakaipatakder ti CDCs iti Malacañang Palace idi Abril 3 nga indauloan ni Presidente Ferdinand Marcos Jr.
Naammoan a mausar iti panangipasdek kadagiti child centers ti Local Government Support Fund-Financial Assistance (LGSF-FA).
