LAOAG CITY – Nakasaganan ti defense team ni dati a Presidente Rodrigo Duterte a mangipresentar ti counter evidence iti isasango ti dati a presidente iti International Criminal Court (ICC) intono Setyembre 23 ita a tawen.
Iti maysa a redacted document napetsaan ti Setyembre 2, inpakaammo ti lead defense lawyer ni dati a Presidente Duterte a ni Nicholas Kaufman iti Pre-Trial Chamber 1 dagiti iggem da nga ebidensiya nga isumitir da iti confirmation of charges hearings a mangsuporta kadagiti argumento kontra kadagiti dokumento a naglaon kadagiti kaso kontra iti dati a presidente.
Ti notification ti defense team ket maiyataday iti Rules of Procedures and Evidence ti International Criminal Court a mangibilbilin iti defense a mangipaay ti listaan dagiti ebidensiya iti korte a saan a nalablabes ngem 15 nga aldaw sakbay ti naituding a panagdengngeg.
Naka-schedule intono Setyembre 23 a panangrugo ti uppat nga aldaw a confirmation of charges hearing para iti maak-akusaran ti crimes against humanity kontra iti dati a Presidente ti Pilipinas.
Ditoy nga establisaren ti korte no adda wenno awan ti umdas nga ebidensiya para iti kaso kontra ken ni Duterte, nga agbalin a pagibasaran no itultuloy ti trial.
