LAOAG CITY – Inlawlawag ti Department of Education (DepEd) a ti agarop 19 a milyon a Pilipino a maikonkonsiderar kas “functionally illiterate”, maibasar iti 2024 survey results ket naggapo iti nalawlawa a grupo ti edad ken saan laeng nga high school graduates.
Iti maysa a position paper, inbatad ni Department of Education Undersecretary Ronald Mendoza a ti datos para ti 2024 Functional Literacy, Education, and Mass Media Survey (FLEMMS) nga inpresentar ti Philippine Statistics Authority (PSA) iti Senate basic education committee iti napalabas a lawas, ti 18.9 milyon nga agtawen ti 10 agingga iti 64 ket maklasklasipika kas functionally illiterate.
Kayatna a sawen daytoy ket adda dagiti tattao a kabaelan na ti agbasa, agsurat, ken agkalkula ngem marigatan da a mangawat, aniaman ti nagun-od da iti edukasyon.
Inpetteng pay ni Mendoza nga adda laeng ti 11.6 million Junior High School ken Senior High School nga agad-adal para iti School Year 2024-2025.
