LAOAG CITY – Ad-adda pay a napaigetan ti deployment dagiti kameng ti Philippine National Police ditoy probinsya.
Daytoy ti inbatad ni Police Col. Joemar Labiano, ti Provincial Director iti Ilocos Norte Police Provincial Office.
Kuna na nga adda dagiti nakaiwaras a kameng ti pulisya kadagiti simbaan ken dadduma pay a lugar a pagdudupudupan dagiti naruay a tattao, karaman dagiti bus terminal ditoy probinsya.
Inpakaammo ni Labiano nga adda met ti 80 a PNP personnel manipod iti Regional Office 1 a naipatulod ditoy probinsya tapno tumulong nga agbantay ken mangipasigurado ti linak, urnus ken talna ita nga holiday season.
Mainaig iti daytoy, binalakadan met ni Labiano dagiti turista a masapol ti naan-anay a panagridam da kabayatan ti pangpaspasyar da kadagiti agkakapintas a lugar ditoy Ilocos Norte.
