LAOAG CITY – Inpakaammo ni Atty. Gerald Gallardo, mangidadaulo iti Department of the Interior and Local Government ditoy probinsia a balligi a naiwayat ti “Kalinisan Clean-Up Drive” iti Brgy. 10 Estancia iti ili ti Pasuquin.
Segun kenkuana, nakikoordinar ti opisinada iti lokal a gobierno iti nadakamat nga ili tapnu madalusan dagiti coastal areas.
Inbatadna a nakipartisipar dagiti residente ken Brgy. Officials iti Brgy. 10 Estancia pakairamanan dagiti kabangibang a barangay, Bureau of Fire Protection iti ili ti Pasuquin ken iti Philippine National Police iti nadakamat nga ili.
Innayonna nga iti kada-tawen ket adda ti iwaywayat ti opisinada a Simultaneously Kalinisan sa Bagong Pilipinas Program iti rehion 1.
Mainaig iti daytoy, gagem ti nadakamat a programa a makissayan ti basura kadagiti coastal areas, pakairaman ti irigasion wenno pagdalanan ti danom iti nagduduma a lugar.
Kunana a daytoy ti nagbalin nga aktibidad ti nasao nga opisina kalpasan a noobserbaran nga kumarkaro ti situasion ti aglalaw nangruna iti mapaspasaran climate change ken global warming iti entero a lubong.
Nupay kasta, kalpasan a naiwayat ti clean-up drive program ket nakaukonda kadagiti nagduduma a basura no sadinno a nakappunoda ti sangapulo a sako manipud iti nadakamat a lugar.
Kabayatanna, nagayaman ni Atty. Gallardo ken ni Mayor Aguinaldo ken Sangguniang Bayan Member Ian Valdez a nakipartisipar iti nadakamat a programa iti ili ti Pasuquin.
