LAOAG CITY – Naiget a naglikudan ni Department of Health (DOH) Secretary Jose “Brix” Pujalte Jr. dagiti akusasyon a masansan ti panagturong na kadagiti casino tapno agsugal.
Basar iti opisyal a rakurak ti Department of Health, ti panagbisita ni Pujalte iti maysa nga hotel iti kallabes ket para iti maysa nga opisyal a taripnong ken saan a para iti personal na.
Inlawlawag met ni Sec. Pujalte nga idi Hulyo 20 ita a tawen ket nagturong iti maysa nga hotel iti Sorsogon para iti maysa nga official meeting kadwa na dagiti lokal nga opisyal ti Masbate ken Sorsogon.
Inbatad na a ti laeng panangipaay na ti tulong kadagiti pampubliko nga ospital iti Bicol region ti napagsasaritaan da iti naisayangkat a taripnong.
Inawagan met ti sekretaryo a maysa nga inuulbud wenno“demolition job” ti agwarwaras a surat tapno madadael ti kredibilidad na kas baro a mangidaulo iti Department of Health.
Immuna iti daytoy, maysa a grupo a nagpabigbig kas“Concerned Citizens” ti nangisumitir ti letter-complaint iti Presidential Complaint Center (PCC) iti Malacañang.
Inakusaran dagiti complainants ni Pujalte a maipagarop a masansan a mapan agsugsugal iti Okada Manila ken Solaire Resort & Casino.
Inakusaran da pay daytoy nga agus-usar kadagiti peke a nagan kas ti “Louis Santos” ken “Louis Santoss” tapno saan a mabigbig ti publiko.
Basar kadagiti agrekreklamo, ti maipagarop a panagsugsugal ni Pujalte ket panaglabsing iti Code of Conduct and Ethical Standards for Public Officials and Employees (RA 6713) ken Presidential Decree 1869, a mangipawil kadagiti opisyal ti gobyerno a sumrek ken agay-ayam iti casino.
Iti baet daytoy, inpasingked ti Department of Health iti publiko nga agtalinaed a nakatutuk ni Secretary Pujalte ken ti sibubukel nga ahensya iti panangipaay ti de-kalidad a serbisyo para iti salun-at iti pagilian.
