LAOAG CITY – Nagballaag ti Department of Health (DOH) iti posible a sakit gapu iti nakaro a kinabara ti panawen kagiddan ti pormalen a panangrugi iti panawen ti kalgaw basar iti PAGASA.
Karaman kadagiti risgo ti heat stroke, sakit iti kudil kas ti sunburn, sore eyes ken food poisoning.
Naabisoan ti publiko nga agusar ti sunscreen (SPF 30+), agisuot ti presko a bado ken masansan nga agdigus tapno maliklikan ti panagbudo iti kudil.
Nasken a siguradoen dagiti mailaslasin a taraon tapno maliklikan ti pannakasabidong.
Inrekomendar ti Department of Health ti panaginum ti adu a danum, panangliklik iti init manipud iti alas nuebe ti bigat agingga iti alas kuatro ti malem ken panangbiruk ti nalinong no adda iti ruar.
Kabayatanna, dagiti makapasar ti nakaro a panagulaw wenno naawanan ti puot gapu iti init ket nasken nga insigida a maitaray iti ospital.
