LAOAG CITY – Inpaayan ti Department of Justice (DOJ) ti agingga iti Marso 9 ita a tawen tapno mangipaay ti counter-affidavit ni Senator Jinggoy Estrada ken dagiti kakadwa na a karaman iti kaso a plunder nga inpila ti National Bureau of Investigation (NBI) .
Segun ken ni Department of Justice spokesperson Polo Martinez, nagnayun ti National Bureau of Investigation dagiti respondents ken ebidensya iti inpasa da a reklamo.
Innayon na nga inikkan ti prosecutors ti National Bureau of Investigation ti agingga iti Pebrero 26 a mangipaay kadagiti kopya dagiti respondents iti ebidensya da.
No maipaayan dagitoy ti dokumento ket adda ti agingga iti Marso 9, 2026 dagiti respondents a mangipasa ti counter-affidavits da.
Saan da metten nga inbutaktak pay ti pakabigbigan dagiti nainayun a kakunsabo ti senador.
