LAOAG CITY – Ginutigot ni Mrs. Fresnaida Gundan, mangidadaulo ti Department of Labor and Employment ditoy Ilocos Norte dagiti Employers ken establishimento nga ag-hire da kadagiti Person’s With Disability wenno PWD.
Segun kenkuana, saan a lapped nga addaan ti rangkap ti bagi dagiti PWD tapno makapagtrabaho kas kadagiti ordinaryo a tao.
Inbatad na nga agdependar kadagiti employer dagiti pagalagadan no anya dagiti kwalipikasyon dagiti PWD tapno makastrek iti trabaho.
Inpakaammo na a mabalin nga agaplikar dagitoy iti nagduduma nga industria kas dagiti fast food chain, malls, pangopisinaan, call center ken dadduma pay ngem nakadepende iti kabaelan ti maysa a PWD.
Mangnamnama daytoy nga iti sumarsaruno nga aldaw ket maikkan ti gundaway dagiti PWD ken dagiti Senior Citizens a maaddaan ti trabaho nupay dagitoy ket nataenganen gapo ta ti napateg ket kabaelan da pay laeng ti agtrabaho.
Mainaig iti daytoy, inlawlawag ni Ms. Carol Domingo, Manpower Development Assistant ti Provincial Social Welfare and Development Office a mabalin nga agaplikar dagiti PWD’s kadagiti lugar da.
Kabayatanna, ibilang ti maysa a bulsek nga agtrabtrabaho iti dakkel a Mall iti ili a San Nicolas a ni Mr. Juanito Rosete a dakkel ti tulong ti Republic Act No. 7277 wenno Magna Carta for Disabled Persons a mangipaay para iti Rehabilitasion, Self-Development ken Self-Reliance kadakuada.
Maipalagip nga inrakurak ni Senior Board Member Dr. Medeldorf Gaoat a nakailanad iti Section 5 nga adda 5 percent iti amin a casual ken contractual positions kadagiti Department of Social Welfare and Development; Health; Education, Culture and Sports ken dadduma pay a Government Agencies, Offices wenno Corporations iti Social Development ket para kadagiti disabled persons.
Daytoy a linteg ti mangted bileg iti pannakaawat dagiti PWD Employment iti aniaman nga establishimento a saan a lapped ken mailanglangi ti physical condition dagitoy.
Iti agdama ket mannarimaan ti maisaysayangkat a Survey kadagiti siyam a lugar ditoy probinsia pakairamanan iti ili a Piddig, Vintar, Solsona, Pasuquin, San Nicolas, Pagudpud, Bacarra, Marcos ken ditoy Siudad ti Laoag ket ditoyda a napinget nga agal-ala ti datos kadagiti agub-ubra kas mannalon ken construction worker nga agtawen ti nababbaba ngem sangapulo ket walo a tawen.
