LAOAG CITY – Nagballaag ni Department of Transportation Secretary Banoy Lopez kadagiti kunniber a kameng ti Office for Transportation Security (OTS) ken inbilin na ti naig-iget a panagbantay kadagiti erupuerto kalpasan ti report a panagtakaw kadagiti pasahero.
Ti nasao nga addang ket sungbt iti direktiba ni Presidente Ferdinand Marcos Jr. a siguradwen nga umdas ti serbisyo dagiti airport personnel, aglalo ket namnamaen ti panagdudupudop dagiti naruay a buyahero manipod kadagiti probinsya ken iti sabali a pagilian.
Kagiddan iti daytoy, dagus nga inbilin ni Lopez ti pannakaikkat iti pwesto ti dua a Security Screening Officers (SSO) ken maysa a supervisor iti Ninoy Aquino International Airport Terminal 3 kabayatan a maisaysayangkat ti imbestigasyon.
Sumangsango dagiti nasao nga opisyal kadagiti kaso a kriminal ken administratibo mainaig iti mapukpukaw a P7,000 ken 1,000 New Taiwan Dollars manipod iti maysa a pasahero nga Australian iti kallabes.
Inpetteng ni Lopez a mapaneknekan nga adda dagiti Security Screening Officers Security a nanglabsing iti linteg, karaman ti panagtagaw iti gamit wenno kwarta ti pasahero, sigurado nga agsungbat dagitoy iti linteg.
Segun iti sekretaryo, dakkel ti responsibilidad dagiti Security Screening Officers a siguradwen ti kinatalged dagiti pasahero ken lapdan ti pannakaiserrek dagiti maipawil a kargamento, isut gapuna a saan a nakaaawat ti aniaman a korapsyon.
Pinalagipan pay ni Lopez dagiti pasahero nga ireport a dagus ti aniaman a mapagduduwaan a garaw dagiti personnel ti erupuerto.
Binalakadan na pay ti publiko a liklikan ti agitugot kadagiti kontrabando tapno saanen a kasapulan pay a lukatan dagiti bagahe da.
