LAOAG CITY – Inikkat ni Public Works Secretary Vince Dizon ti maysa a maintenance chief kasaruno iti report dagiti delayed wenno naladaw a panagsungbatna iti kalamidad.
Basar iti August 29 memorandum, inbilin ni Dizon ti pannakaikkat ni Engr. Loreto Balena Jr. kas maintenance chief ti Las Piñas-Muntinlupa District Engineering Office.
Inbatad ni Dizon ti “unsatisfactory performance, lack of urgency, and delayed response to calamities” ni Balena kas ground iti pannakaikkatna iti puesto.
Mainaig iti daytoy, nadutokan ni Balena a kompletoen ti inventory ti opisinana, leppasen ken pirmaan dagiti pending a dokumento ken deliverables ken i-turn-over ti official records ken sabali pay a papeles.
Nupay kasta, inallukoy ni Senador JV Ejercito ti Department of Public Works and Highways a kompletoen dagiti saan pay a nalpas a flood control projects sakbay nga irugi dagiti baro a proyekto gapu ta dagiti saan pay a nalpas nga imprastraktura ti mangpakaro kadagiti panaglayus iti pagilian.
