LAOAG CITY – Nagtalinaed ti maysa a drayber ti ambulansya iti kuerpo ti pulisya kalpasan a pinatay na ti maysa a jeepney driver babaen ti panangpaltog na iti Brgy. 17 San Felipe iti ili a Sarrat.
Nabigbig ti biktima a ni Antonio Abay, agtawen ti 36 nken residente ti nasao a baangay idinto a ti suspek ket ni Reggie Rivac, agtawen ti 30, ambulance driver ti Sarrat ken residente iti Brgy 15 iti nasao nga ili.
Segun kenni Chief Insp. Roldan Suitos, nagiinom ti biktima agraman ti suspek ken sabsabali pay iti maysa a pasken iti Brgy. 17 idi ta rimsua ti saan a panagkinnaawatan dagiti dua.
Dagus a binonot ti suspek ti paltog na ken pinaltogan na ti biktima.
Naitaray ti biktima iti pribado nga ospital ngem naideklara a dead on arrival.
Nakaala dagiti otoridad ti pito a basyo ti bala ti kalibre 45 a paltog ken tallo nga deformed slug.
Maisagsaganan ti reklamo a maipila kontra kenni Rivac ken agtultuloy pay laeng ti imbestigasyon dagiti otoridad mainaig ti napasamak a pammaltog.
