LAOAG CITY – Nagpadespensar ni Department of Social Welfare and Development Secretary Erwin Tulfo kadagiti estudyante ken nagannak wenno guardians a saan a nakaawat ti educational assistance iti baet a nakipila da a nasapa iti Batasan Complex idiay Quezon City.
Inbatad na nga ar-aramiden da amin a wagas tapno masolusyunan ti pagkurkurangan ti opisina da.
Inpalgak na a planplanwen ti DSWD nga ibaba laengen ti tulong pinansyal kadagiti opisina iti lokal a gobierno.
Innayon na a mabalin nga ibaba da daytoy iti munisipyo ngem saan nga iti barangay gapu ta ti barangay ket agkidkiddaw ti indigency ket saan a kayat dagiti tattao.
Maipalagip a kalpasan nga inrakurak ni Tulfo a ti imatunan na nga ahensya ket agibunong ti pinansyal a tulong para kadagiti indigent students iti kada sabado agingga intono September 24.
Inrakurak na a mangipaay ti DSWD ti P1,000 para kadagiti elementary students, P2,000 para iti high school students, P3,000 para iti senior high school students, ken P4,000 para kadagiti college students wenno vocational courses.
Kuna na pay a tallo laeng a benepisyaryo ti maipaayan iti kada pamilya.
Segun ken ni Tulfo, dagiti mayat a manggundaway iti daytoy a tulong ket agitugot laeng ti enrollment certificate ken school ID.
