LAOAG CITY – Natiliw dagiti dua nga aglaklako ti nadinamita nga ikan ti merkado publiko iti ili ti San Nicolas babaen ti inyuswat nga operasyon ti Maritime Police, BFAR ken PNP-San Nicolas.
Nabigbig dagitoy a da Maria Teresa Antonio Asuncion, 28, taga Barangay 10 iti nasao nga ili ken Eric Agustin, 46, taga Barangay 19, San Nicolas.
Segun kenni Police Major Proceso Semana II, station chief ti Maritime Police a nakabase idiay ili ti Currimao, adda ti dimmanon kadakuada a report nga adda ti aglaklako ti nadinamita nga ikan.
Inlawlawag na nga adda ti gimmatang a maysa kadakuada ti ikan ken dagus da nga ipaeksamin iti BFR ken ditoy a nagpositibo a nakalap dagiti tagilako babaen ti panagdinamita.
Sumango dagiti natiliw iti panaglabsing iti Republic 10654 wenno Fisheries Code of the Phlippines.
Naamoan nga adda ti imonmonitor da nga aglaklako ti nadinamita nga ikan iti nasao nga ili ngem saan a dagiti natiliw dagitoy.
Kunana a saan met nga ibaga dagiti maseknan no siasinno ti supplier da kadagiti ilaklako da nga ikan.
Nakumpiskar dagiti operating team ti 50 a kilo a palapal nga ikan.
Kabayatanna, inpetteng ni Asuncion, maysa kadagiti natiliw iti panaglako ti nadinamita nga ikan a saan na nga ammo nga iligal a naala dagiti lako na.
Kuna ni Asuncion a datin a pagal-alaan da ti supplier da ti ikan ngem ita da laeng a maamoan a nadinamita dagiti lako da.
Gapo iti daytoy, saan da pay laeng nga aglako ti palapal nga ikan nga nag-angkaten da iti taga Barangay Davila iti ili ti Pasuquin.
Inlawlawag a ti nagited kadakuada ti ikan ket inangkat na met laeng iti sabali nga indibidwal.
