LAOAG CITY – Inbatad ni Assistant Secretary Mercedita Sombilla ti National Economic and Development Authority (NEDA) a ngimmato iti 6.6% nga average ti ekonomiya ti Pilipinas iti nagbaetan ti 2016 agingga iti 2019.
Daytoy ti makagapu nga iti iseserrek ti 2020 ket maibilang a napigsa ti ekonomiya ti pagilyan ngem naapektaran manen gapu iti mapaspasaran a coronavirus pandemic.
Inlawlawag ni Sombilla a dakkel ti nagbabaan ti ekonomiya ti pagilyan ken daytoy ita ti ad-adalen ti gobierno no ania dagiti maisayangkat a recovery program.
Aminado ti opisyal a possible a narigat a makasubbot ti pagilyan ngem kuna na a masapol nga iprayoridad da dagiti programa a patien da a dakkel ti maitulong na iti in-inot nga ibabangon ti ekonomiya ti Pilipinas.
Iti baet daytoy, inkari ni Sombilla nga itultuloy da a tulungan dagiti agkasapulan kas iti Micro Small Medium Enterprises (MSMEs).
Mainaig iti daytoy, inbaga ni Monsabilla a kagiddan dagiti isayangkat da a programa tapno makabangon ti ekonomiya ti Pilipinas ket masapol a mabalanse da ti health concerns ken ti aspeto ti ekonomiya.
Kabayatanna, saan met a maibaga ni Monsabilla no kasanu ti kabayag na sakbay nga agsubli ti dati a kinapigsa ti ekonomiya ti Pilipinas.
