LAOAG CITY – Linapdan manen ti Amerika ti maysa a draft resolution iti United Nations Security Council nga agpanpanawagan para iti dagus ken permanente a pannakaipatungapal ti ceasefire iti Gaza ken ti pannakawaya-waya dagiti hostages.
Daytoyen ti maikanem a gundaway a linapdan ti Amerika ti nasao nga addang.
Segun ken ni US deputy Middle East envoy Morgan Ortagus, ti panagkedked ti Amerika iti resolusyon ket saanen a nakakaskasdaaw.
Daytoy ket gapu ta napaay ti maipagarop a resolusyon a mangkondenar iti Hamas wenno bigbigen ti karbengan ti Israel tapno ikalintegan ti bagina ken saan nga umiso a pagbalinen a lehitimo dagiti naratibo a mangbenipisyo iti Hamas.
Dagus met a nangirakurak ti pannakadismaya dagiti kameng ti United Nations iti nagbalin nga addang ti Estados Unidos.
Amin dagiti 14 a dadduma pay a miyembro ti Security Council ket nagbotos ti pabor iti draft resolution, a nangiladawan iti sitwasyon iti Gaza kas didigra ken agpanpanawagan da iti Israel nga ikkaten aminen dagiti restriksiyon kadagiti ayuda.
Inaramid ti konseho ti addang iti baet ti ballaag ti United Nation humanitarian office a maib-ibusen ti naudi a lifelines iti Gaza City kalpasan nga inyalud-od ti Israel ti opensiba da.
