LAOAG CITY – Nabalkot ti buteng dagiti residente idiay America kalpasan ti napasamak nga assassination attempt ken ni dati a presidente ti Estados Unidos a ni Donald Trump.
Ngem nu pay kasta ket mabalin nga itultuloy ni Trump dagiti nakalinya nga aktibidadna iti laksid ti gandat a panangpapatay kenkuana kabayatan ti rally na idiay Pennsylvania, USA.
Daytoy ti inpakaammu ni Bombo International News Correspondent Henry Afaga, no sadinno a nakatutok ita ti dua a political parties ti America idiay Pennsylvania, gapu ta maibilang daytoy kas maysa kadagiti estado nga addaan iti dakkel nga electoral vote.
Segun kenkuana, maysa kadagiti kitkitaen da a motibo ti nadakamat nga insidente ket ti isyu seknan ti politika, nangruna ti mapaspasangasangan nga eleksion inton Nobiembre iti nasao a pagilian.
Binigbig pay ni Afaga ti suspek nga agtawen ti 20 ken mapapati a Democrat supporter ken napigsa ti gurana iti dati a presidente.
Kabayatanna, iti laksid ti panagsusupiat ti politika, inpadanon metten ni United State President Joe Biden ti panangkondenarna no sadino a ti nadakamat nga addang ket tapno malapdan met ti tension.
Iti agdama, no pay mabutbuteng dagiti umili iti nasao a lugar ket inpasigurado dagiti otoridad ti panangtaginayon iti urnos bayat nga umas-asideg ti eleksion.
Maipalagip a rugrugi pay laeng ti campaign speech- ni Trump idiay Butler, Pennsylvania idi kellaat a adda nagpaputok ken natamaan iti makannawan a lapayagna idinto a nagresulta met ti insidente iti pannakatay ti suspek ken ti bystander a timmabuno iti nadakamat nga aktibidad.
