LAOAG CITY – Nasakit ti nakem ti maysa nga estudiante iti Ilocos Norte National High School kalpasan a maipagarup a pinungot isuna ti maysa a mangisursuro a ni Ms. Marites Peralta a Grade 11 Adviser.
Segun iti estudiante, napungot isuna gapu ta awan ti maitedna a diploma a maysa kadagiti requirement a dawdawaten iti nasao a mangisursuro kenkuana.
Inbatadna a dawdawaten ti mangisursuro ti diploma kenkuana gapu ta masapol para iti panagpa-enroll daytoy.
Nupay kasta, gapu ta naggapu iti Alternative Learning System ti agad-adal ket awan pay ti naipaay kadakuada a diploma banag a kanayon met ti panang-follow up-na maipanggep iti daytoy a banag.
Inpalgakna a nakisarita isuna iti mangisursuro a mabalinna ited ti diplomana iti kamalemanna ngem ditoy metten a napungot daytoy.
Gapu iti daytoy, nagawid ti estudiante iti pagtaenganda tapno ipulong ti napasamak kenkuana iti pamiliana rason a kinuyog met ti amana daytoy iti pagadalan tapno agsasaritada maipapan iti napasamak.
Innayonna a daytoyen ti maikatlo a daras a maipagarup dinangran isuna ti maseknan a mangisursuro no sadinno iti sangoanan pay dagiti kaklasena.
Kabayatanna, naammoan nga inyakaren ti ama ti anakna iti Ilocos Norte College of Arts and Trades a dagus met nga inawat ti nadakamat a pagadalan iti baet nga awan pay ti diplomana.
Iti agdama, bayat a maisursurat daytoy a damag ket ikarkarigatan ti Bombo Radyo Laoag News Team nga alaen ti reaksion ti maseknan a mangisursuro maipanggep iti nasao a pasamak.
