LAOAG CITY – Kinumpirmaran ti Food and Drug Administration (FDA) a nakaawat ti 25 a report mainaig iti boluntaryo a panagi-recall ti sumagmamano a batch ti Nan Optipro ken Nankid Optipro a gatas para iti maladaga ken ubing.
Manipod kadagiti nasao a report, 18 ditoy ket adda ti pakainaigan dagiti isyu ti salun-at a napasaran dagiti ubbing kalpasan nga imminom da kadagiti apektaado a produkto.
Karaman kadagiti naireport a sintomas ket ti panagvomit, panagsakit ti buksit ken adda pay ti sumagmamano a kaso a kasapulan a maipaagas iti ospital.
Mainaig iti daytoy, inpasigurado ti Food and Drug Administration nga agtultuloy ti panangtingiting da iti amin a report ken makikokoordinar dan kadagiti maseknan nga ahensya, kasta pay ti Nestlé Philippines, Inc., tapno masigurado a naurnus a maipatungpal ti pannaka-recall kadagiti nasao a produkto.
Nabalakadan met dagiti nagannak ken caregiver a bantayan a naimbag ti salun-at dagiti ubbing ken dagus a mapan ipakita iti doctor no makapasar da ti sintomas.
