LAOAG CITY – Maidiaya ti free bus ride kadagiti deboto nga awan ti luganna para iti Visita Iglesia inton Huebes Santo, Abril 2.
Segun ken ni Engr. Neil Jose, ti dati a National President iti Pugad Lawin, adda ti uppat a bus ti Pugad Lawin a mausar a pagluganan dagiti deboto nga agpasiar kadagiti pito a simbaan no sadinno dua a bus para iti bigat ken dua met para iti malem.
Nupay kasta, inlawlawagna a gapu iti kinangina ti gasolina iti agdama ket posible a saan a matuloy nga agbiahe ti dua a bus nga agbiahe para iti malem.
Inbatadna nga aguray dagiti bus iti oras ti alas sais ti bigat iti sango ti Kapitolio Probinsial.
Naammoan a karaman kadagiti simbaan a bisitaenda ket ti Mangato Church, Paoay Church, Currimao Church, Badoc Church, Sinait Church, Batac Church ken ti San Nicolas Church.
Mainaig iti daytoy, malaksid iti maidiaya a free ride ket mangipaay pay ti grupo ti danum ken taraon para kadagiti deboto.
Kabayatanna, daytoy ti maikatlo a daras a nangidiayada ti free bus ride para iti Visita Iglesia.
