LAOAG CITY – Maisayangkat intono bigat ti “Gabay Guro Teachers Fest 2020” nga atendaran amin dagiti mangisursuro nga addaan ti PRC License iti pribado ken pampubliko a pagadalan iti intero nga Ilocos Norte.
Inlawlawag ni Doctor Joan Corpuz, DepEd Supt. ditoy probinsya nga iti bigat ket adda ti maisayangkat a seminar/training kadagiti napili laeng a mangisursuro.
Inbatad na a dagiti tema ti maiyuswat a seminar ket ”Surviving and Living a Teaching in a Technology Lead Classroom” ken Financial Literacy.
Innayon na nga iti oras ti alauna iti malem agingga iti alas-sais ket adda ti maangay a konsierto a pagpabuyaan dagiti agkakalatak a kumakanta ditoy pagilyan.
Karaman ditoy da Regine Velasquez, Sharon Cuneta, Jona Viray, Gabby Conception, Zephanie Dimaranan Jaya ken dadduma pay.
Malaksid iti konsierto, adda pay ti maangay a raffle draw a pangabakan dagiti gadgets, technology equipment, cash prizes a ti major prize ket P100 ribo a pisos.
Kabayatanna, inbatad ni Corpuz a makaammo dagiti principal a mangkita no ania ti kapintasan a maaramid iti bigat kadagiti idaulwan da a pagadalan gapu ta iti malem pay laeng nga agatendar da amin iti nasao nga aktibidad.
Innayon na a mabalin pay laeng dagiti mangisursuro ti mangklase iti bigat.
