LAOAG CITY – Binabalaw ni Presidential Adviser on Poverty Alleviation Secretary Larry Gadon da Senador Alan Peter Cayetano ken Senador Rodante Marcoleta mainaig kadagiti alegasion nga inrakurak dagiti naawagan a “maleta boys,” iti Senado a maipagarup nga scripted nga operasion tapno maiyaw-awan ti atension ti publiko.
Iti maysa a video statement a naiparuk-at ita a lawas, inbatad ni Gadon a nalawag a tarigagay ti grupo ni Cayetano a makontrolda ti liderato ti Senado tapno maliklikan ti agtultuloy nga impeachement case kontra ken ni Vice President Sara Duterte.
Inpetteng ni Gadon nga adu dagiti iregularidad a nariparna kadagiti sungbat dagiti inawaganna a maleta boys kadagiti saludsod ti Blue Ribbon Committee ken arig adda ti nakasagana nga script-da kadagiti maipagarup a leading questions a saludsod dagiti agpanpanday linteg.
Kabayatanna, awan pay ti opisial a sungbat da Cayetano ken Marcoleta mainaig kadagiti babalaw ti sekretario.
