LAOAG CITY – Umanamong ni Gov. Cecilia Araneta Marcos kadagiti saan a mangayat a maipasdek ti off-shore windfarm ditoy probinsia
Inbatad ni Gov. Marcos a sabali dagiti panagadal ti kompania nga iprispresentarda kenkuana gapu ta maibasar dagitoy iti pagilian a Denmark ken Netherlands.
Inlawlawagna a sabali ti angin ditoy probinsia no idasig kadagiti dadduma a pagilian isut gapuna a masapul ti naig-iget a panagadal ken panagsukisok maipanggep iti daytoy a banag.
Kunana a nasken nga adda ti panagkonsultar ti kompania iti Local Government Unit tapno maammoan ti lokal a gobierno dagiti rumbeng a maaramid wenno mapasamak.
Inpettengna nga ipangpangruna ti pagsayaatan dagiti umili ken kinatalged iti aglawlaw tapno awan ti madadael wenno maapektaran iti pannakaipasdek ti nasao a proyekto.
Maipalagip a saan nga umanamong ni Mayor Garcia iti ili ti Burgos iti plano ti Buhawind offshore wind farm a mangipasdek ti offshore wind farm iti kabaybayan iti nasao nga ili gapu ta maapektaran ti panagkalap dagiti mangngalap nga isu ti kangrunaan a pagsapulan dagiti residente.
Immuna iti daytoy, mangisayangkat ti Buhawind offshore wind farm ti public consultation iti ili ti Burgos inton Hulio 17.
