LAOAG CITY – Nagballigi ti naiyuswat a search warrant operation iti Sitio Canary, Brgy. 32, Corocor iti ili ti Bacarra babaen ti nagtitipon a pwersa ti PDEU, PDEA, ken PNP-Bacarra.
Nabigbig ti subject ti operasyon a ni James Afaga y Mendoza, agtawen ti 22, Grade 12 Student ken residente iti nasao a barangay.
Nailanad iti search warrant a naisayangkatan ti operasyon ni Afaga gapu iti maipagarop a panagsalungasing na iti Republic Act (RA) 9165 wenno Comprehensive Dangerous Drugs Act of 2002.
Iti panagsukimat dagiti otoridad iti maysa kadagiti kwarto iti pagtaengan da Afaga ket nakaala da manipod iti uneg ti durabox ti icebag a naglaon ti maipagarop a napagango a bulong ti marijuana, dua a sachet a naglaon met laeng ti maipagarop a napagango a bulong ti marijuana a naipan iti kaha ti sigarilyo, ken ti dua nga stick ti sigarilyo nga addaan ti marijuana.
Kabayatanna, inbatad ni Barangay Chairman Angel Ramil iti Barangay Corocor iti ili ti Bacarra a ti paggaammo na iti subject ket nasayaat a tao ken awan pulos ti madi a rekord na iti barangay da.
Nupay kasta, mamati a mabalin a naisungsung ni Afaga iti madi nga aramid dagiti barkada na.
Mainaig iti daytoy, basar kadagiti otoridad ket karaman ni Afaga iti Top 10 Regional Drug Watchlist iti PNP-Region 1 ken addan tallo a bolan a monmonitoren da sakbay nga inyuswatan da ti operasyon.
Inadmitir met ni Afaga iti Bombo Radyo Laoag nga Agosto 2021 ti naudi a panagusar na ti illegal a droga ngem inpasingked na a saan nga aglaklako iti daytoy.
