LAOAG CITY – Balligi ti naisayangkat a greyhound operation iti Ilocos Norte Provincial Jail.
Segun ken ni Jail Warden Benilda Sadian ti Ilocos Norte Provincial Jail, daytoy ket kalpasan nga awan ti nakitada nga aniaman a maipawil a banag a naiserrek iti pagbaludan babaen iti naiget a panagsukimat dagiti kameng ti Philippine National Police ken Philippine Drug Enforcement Agency.
Inbatadna a daytoy ket surprise inspection tapno maduktalan no adda ti ilemlemmeng dagiti balud nga aniaman a kontrabando iti uneg ti pagbaludan.
Kunana a naiget ti pammilinna kadagiti amin a balud a sumurot kadagiti maipatpatungpal a pagannurutan tapno saanda a mapatawan ti nadagsen a pannusa.
Innayonna nga iti agdama ket adda ti 97 a nakaibalud no sadino pito kadagitoy ket babbai a sumangsango iti kaso nga adda iti pakainaiganna iti iligal a droga ken panagtatakaw.
