LAOAG CITY – Kinumpirmaran ni Mr. Roy Pandarawan, ti Guidance Counselor ti Sarrat National High School iti ili a Sarrat nga estudyante da dagiti adda iti agwarwaras a video scandal iti social media idiay Brgy. San Mateo ditoy ciudad ti Laoag.
Segun kenni Pandarawan, karaman dagitoy ti 6 a grade 10 student ken maysa a grade 9 ti maipagarop a nangivideo ti nasao a scandal.
Rumrumuar a kalpasan ti klase dagiti agbabarkada iti bigat pakairaman dagiti dua nga adda ti video scandal ket nagturong da iti maysa a kubo-kubo iti nasao a barangay a nakapasamakan ti nasao a banag.
Basar ti panagimbestigar ti nasao pagadalan, saanen a simrek iti klase da ti malem dagiti nasao nga estudyante idi napasamak ti nasao nga eskandalo.
Inbatad na a pinaayaban da a dagus dagiti nasao nga estudyante ken dagiti nagannak da para iti komprontasyon ita nga aldaw tapno malawlawagan ti nasao nga isyu, ken malapdan ti panagwaras ti video iti social media.
Inpasingked met dagiti mangisursuro nga awan ti kopya dagiti estudyante ti nasao a video tapno saanen nga agwaras iti social media.
Ti mainaig a damag, inpasingked ni Dr. Vilma Eda, ti DepEd Schools Division Superintendent a nasken a matarabay a nasayaat dagiti estudyante kalpasan ti nasao a sex scandal.
Kunana a nasken a kitaen nga ummuna ti pagadalan dagiti pagsayaatan dagiti ubbing babaen ti guidance and counseling programs.
Inbatad na a saan laeng a ti pannakadusa da ti napateg nu diket nasken a tarabayen ida a nasayaat.
Kabayatanna, inbatad ni Eda a posible a sumango ti criminal liability ti nagpost ti nasao a video kangrunaan na nu awan ti pammalubos dagiti karaman iti nasao sex scandal nga ipost na daytoy iti social media.
Inlawlawag na nga agpapan ita ket awan pay ti naawat da a mandato nu anya ti rumbeng nga aramiden da kadagiti adda ti likudan iti daytoy.
Nupay kasta, naituding ita nga aldaw a panagsasarita dagiti maseknan a nagannak ken dagiti annak da a karaman iti video.
