LAOAG CITY – Inawagan a fake news ti dua a lider ti Kamara de Representantes ti rakurak ni Davao City Mayor Sebastian “Baste” Duterte nga immadu ti bilang ti krimen ita maidasig iti panawen ti amana a ni dati a Presidente Rodrigo Roa Duterte.
Segun ken ni House Assistant Majority Leader Jay Jhonghun iti nagbalin a banat ni Mayor Baste a makita nga adda ti disinformation gapu ta nangatngato ti crime rate idi panawen ni dati Presidente Duterte no idasig iti agdama nga administrasion ni Presidente Marcos.
Dinakamat ni Khonghun, mangidadaulo ti House Special Committee on Bases Conversion, ti datos ti Department of Interior and Local Government (DILG).
Inbatad ni Khonghun a saan nga agul-ulbod ti datos ti Department of Interior and Local Government no sadinno nga idi Hulio 1, 2016 agingga iti Abril 2018, dimmanon iti sumurok 196 a ribu ti nairekord a crime index iti nasao a panawen. Iti agdama, iti babaen ni Presidente ni Marcos, bimmaba daytoy ti sumurok 71,500.
Kunana a nasken a bigbigen ti naballigi a panagbaba ti bilang dagiti krimen iti administrasion Marcos.
Inlawlawag ni House Deputy Majority Leader Paolo Ortega V ti La Union a saan nga agul-ulbod dagiti numero a mangipasimudaag kadagiti survey a pammaneknek a ti kampania kontra iti kriminalidad ket saan a kasapulan a nadara.
Basar iti rekord ti Philippine National Police, nakairekord ti 3,528 a kaso ti focus crimes manipud idi Enero 1 agingga iti Pebrero 14, 2025 wenno katukad ti 26.76 percent a panagbaba manipud iti 4,817 a kaso iti kapada a panawen iti napalabas a tawen.
Karaman kadagiti krimen ket ti panagtatakaw, panagsipdot, panagrames, murder, homicide, physical injury ken ‘car-napping’ dagiti motorsiklo ken dadduma pay a motor vehicles.
Maibasar pay iti Philippine National Police, naaddaan ti panagbaba ita a tawen ti insidente ti rape iti 623 a kaso manipud iti 1,261 wenno agarup kagudua.
Iti year-on-year data, naaddaan ti 7.31% a panagbaba iti focus crimes iti 41,717 nga insidente idi 2023 iti 38,667 laeng daytoy idi 2024.
