LAOAG CITY – Inbatad ti House prosecution panel nga awan pay ti pinal a desisionda no ibabawida wenno saan ti kaso a bribery iti babaen ti Article III ti Articles of Impeachment kontra ken ni Bise Presidente Sara Duterte.
Kuna ti House prosecution legal spokesperson a ni Atty. Jay Tolosa nga agdeliberasyon pay laeng dagiti piskal iti nasao a banag ta ikonsiderarda nga agpada ti sentimiento dagiti senador-judges ken ti publiko tapno mapadaras ti impeachment proceedings ken saan nga ipalubos nga agtultuloy agingga iti sumaruno a tawen.
Ti Article III ket mainaig ti alegasion a masapul a ma-impeach ti Bise Presidente gapu iti panagaramidna iti bribery iti babaen ti panangtedna iti monetary gifts wenno bayad kadagiti opisial ti Department of Education (DepEd) tapno maituloy ti panaglabsing ken panangliklik iti procurement ken dadduma pay a mainaig a linteg.
Kinunana a naurnongen ti House prosecution team dagiti rekord manipud iti Bureau of Internal Revenue ken ti Anti-Money Laundering Council para iti Article II, a mangikalintegan a nakaurnong ni Duterte iti di mailawlawag a kinabaknang.
Nupay kasta, kinunana a mabalin a pilien ti prosekusion nga idatag ti umuna nga Article II a sarunuen ti Article III.
