LAOAG CITY – Kinarit da House Assistant Minority Leader ken Camarines Sur 3rd District Rep. Gabriel Bordado Jr. dagiti agpanpanday linteg a mangaramid ti maysa a konkreto nga addang kalpasan ti napatibker a report ti House Quad Committee maipanggep iti extrajudicial killings (EJKs) iti panangipatungpal ti Duterte drug war.
Iti manipestasion iti panagdengngeg ti komite idi Martes, nagpanawagan ni Bordado ti hustisia para kadagiti biktima ti extrajudicial killings iti napalabas nga administrasion nga inladawanna a maysa a nasipnget a kabanata iti pakasaritaan ti Pilipinas.
Basar kadagiti ebidensia a rimmuar iti panagdengngeg ti Quad Committee, rumrummuar nga adda ti sistematiko a panaglabsing iti karebbengan ti tao idi war on drugs campaign.
Basar iti report ti komite, mabalin nga iduron dagiti ahensia ti gobierno ti panangipataw ti Republic Act 9851 mainaig iti krimen kontra iti international humanitarian law, genocide ken dadduma pay a krimen kontra kadagiti tattao.
Sinuportaran met ni Bordado ti pangipasa dagiti nailungalong a linteg tapno masolbar dagiti problema iti linteg a nakita ti Quad Comm kas ti panangklasipikar iti extrajudicial killings kas heinous crimes, panangipawil ti Philippine Offshore Gaming Operators (POGOs), panangpapigsa ti mekanismo para iti civil forfeiture dagiti sanikua nga iligal a ginatang ken panangipatakder ti maysa nga independent a Philippine National Police Internal Affairs kas independent ken autonomous agency.
