LAOAG CITY – Dandanin a malpas ti impeachment proceedings kontra ken ni Vice President Sara Duterte iti tukad ti komite ti Kamara de Representantes basar ken ni House Assistant Majority Leader Lanao del Sur 1st district Rep. Zia Alonto Adiong a maysa met a miembro ti Committee on Justice.
Manamnama a maisayangkat ti maudi a panagdengngeg inton Abril 29.
Sakbay daytoy, naikeddeng pay a mangiwayat ti panagdengngeg ti justice panel inton Abril 22 kabayatan ti panangtingiting no adda ti “probable cause” dagiti impeachment complaint kontra iti Bise Presidente.
Karaman kadagiti akusasion iti impeachment ti maipagarup a panagpangta kadagiti nangangato nga opisial ti gobierno, saan nga umno a panagusar iti confidential funds, saan a mailawlawag a baknang ken dagiti iregularidad iti Statement of Assets, Liabilities and Net Worth (SALN) ni Vice President Sara.
Kuna ni Adiong, pagdedebatean pay dagiti miembro ti komite ti maipapan iti probable cause sakbay nga iparuk-at ti committee report a manamnama nga isubmitir iti plenario ti Kamara de Representantes iti panagsubli ti sesyon inton Mayo 4.
Inlawlawagna a ti committee report nga agserbi a pakabuklan a findings ti panel ket saan pay a desision iti Bise Presidente no diket rekomendasion pay laeng no nasken nga ituloy ti impeachment iti Senado.
No maaprobaran iti plenario, ti sumaruno nga addang ket ti impeachment trial iti Senado no sadinno nga agdesision dagiti Senador no agtalinaed iti puesto wenno mapadisi iti puesto ni Vice President Sara.
