LAOAG CITY – Inikkaten ti Department of Agriculture (DA) ti importation ban iti wild ken domestic birds ken dadduma pay a poultry products manipud iti California ken South Dakota idiay Estados Unidos.
Basar iti Memorandum Order No. 37 a pirmado ni Agriculture Secretary Francisco Tiu Laurel Jr., ipalubosen ti Department of Agriculture ti panagangkat ti domestic ken wild birds ken kadagiti produkto pakairamanan dagiti poultry meat, day-old chicks, dagiti itlog ken semen manipud kadagiti dua nga estado ti Amerika.
Iti nasao a Memorandum, inbatad ti Department of Agriculture a naikkaten ti ban kalpasan nga awanen ti nairekord nga outbreak idiay California kalpasan ti Hunio 14, 2024 idinto nga awanen ti naipadamag nga outbreaks idiay South Dakota kalpasan ti Mayo 29, 2024.
Maipalagip nga idi Enero ket inyatnag ti ahensia ti importation ban kadagiti domestic ken wild birds pakairamanan ti poultry products manipud idiay California gapu kadagiti outbreak ti avian influenza.
Kabayatanna, naiparuk-at ti ban kadagiti kapada a produkto para iti South Dakota idi Nobiembre 2023 gapu kadagiti kaso ti bird flu.
Nailanad pay iti Memorandum, ti importation ban iti poultry products ket mabalin a maipataw iti kanito a tallo wenno nasursurok pay a pagilian ti maapektaran ti influenza.
