LAOAG CITY – Pinaigetan dagiti linemen ken dagiti meter reader ti operasyon dagitoy kontra kadagiti illegal ti koneksion na iti kuryente pakairamanan dagiti agtaktakaw ti kuryente.
Daytoy ti naiget a pammilin ni Acting General Manager Cipriano “Perry” Martinez kalpasan a naipakaammo kenkuana nga adda dagiti naduktalan nga illegal ti koneksion na iti naisayangkat nga inspeksion iti arinunos ti lawas.
Mainaig iti daytoy, kuna ni Martines nga adda ti 38 a member-consumers a naduktalan a mangisaysayangkat ti “illegal flying connections” ken dadduma pay a wagas iti panagtakaw ti kuryente ti immasideg iti opisina na tapno makikompromiso dagitoy a mangbayad iti rumbeng a bayadanda pakairamanan ti naipataw a multa kadakuada.
Kagiddan daytoy, impasigurado ni Martinez kadagiti 190 a ribo a Member Consumer Owners wenno MCO’s ti Ilocos Norte Electric Cooperative nga aramiden ti kooperatiba ti amin a kabaelanna tapno maipababa ti bilang dagiti agtaktakaw ti kuryente a rason iti kaadda dagiti baybayadan dagiti Member Consumer Owners a “systems and transmission loss”.
