LAOAG CITY – Inlawlawag ti Ilocos Norte Police Provincial Office, babaen ken ni P/Maj Sheryl Guzman, officer in charge ti Police Committee Affairs and Development Unit a ti maipagarup a bomb threat iti Kapitolio Probinsial ket maysa surprise bomb threat drill tapno makita no kasano kaalerto dagiti tattao nu adda ti saan a manamnama a mapasamak.
Segun kenkuana, nangrugi ti drill iti oras ti 10:30 ti bigat kalpasan a nakaawat ti maysa nga empleado ti Kapitolio Probinsial ti tawag manipud iti saan pay a nabigbig a caller.
Nupay kasta, nagpabigbig kas maysa nga inheniero ti caller ken kinunana nga adda ti maipagarup a nakaimula a bomba kadagiti saan a masinunuo a lugar iti Kapitolyo Probinsial ken Laoag City Hall.
Mainaig iti daytoy, binilin pay ti caler ti empleado a makiuman iti Provincial Engineering Office ken agusar iti thermographic scanner tapno mabirokan dagiti mapapati nga eksplosibo.
Gapu iti daytoy, insigida ti nagbalin a tignay ti INPECU (Ilocos Norte Provincial EOD Canine Unit) tapno kitaenda dagiti lugar.
Kalpasan ti naan-anay a panag-inspeksyonda iti Kapitolio ken Laoag City Hall, kinumpirmaran da nga awan ti nasarakanda nga eksplosibo.
Kabayatanna, panggep ti nasao a drill ket tapno matingiting ti kinasagana dagiti staff ti gobierno, emergency responders, ken lokal nga autoridad iti panangtaming kadagiti pangta kas iti pangta ti bomba.
Immunan iti daytoy, nakaawat ti maipagarup a bomb threat ti Kapitolio Probinsial ti Ilocos Norte kalpasan nga adda ti naawat a tawag ti Provincial Administrator’s Office babaen ti landline.
