LAOAG CITY – Inbatad ni PCapt. John Mark V. Vergara, hepe ti Currimao Municipal Police Station a manarimaan pay laeng ti panang-review-da kadagiti Closed-circuit television (CCTV) footage ti naggapuan ken nagturungan dagiti holduper iti maysa a gasolinaan iti ili ti Currimao.
Napasamak ti insidente ti maysa a gasolinaan iti Brgy. Maglawi Sur iti nadakamat nga ili itay parbangon, Oktubre 17 no sadinno riding in tandem ti primary suspect.
Basar iti footage, nakita nga immuna a nagpagasolina dagiti suspek sakbay ti pannakaisayangkatda ti planoda a panang-holdup.
Segun ken ni PCapt. Vergara a marigatanda a mangbigbig ti kinasiasinno dagiti suspek gapu ta nakasuot dagitoy iti helmet.
Kabayatanna, saanda pay maipasigurado no adda iti nadakamat nga armas dagiti suspek iti insidente ken awan pay ti naited nga estimate iti gatad ti kuarta wenno ramit a naala.
Nupay kasta, inlawlawag ni PCapt. Vergara a ti mismo na-holdup wenno naalaan iti alikamen ket ti mismo a cashier wenno agbanbantay iti gasolinaan.
