LAOAG CITY – Nakabusor ti Japan ti narisgo nga inaramid ti fighter jet ti China a dandanin a natamaan ti eroplanoda iti Pacific Ocean.
Inbatad ni Chief Cabinet Secretary Yoshimasa Hayashi a ti J-15 Chinese warplane nga aggapu iti Shandong aircraft carrier ket timmayab iti 45 meters nga asideg iti P-3C maritime surveillance plane ti Japan.
Ti P-3C aircraft ket kukua ti Maritime Self-Defense Force ti Japan a nakabase iti isla ti Okinawa.
Mangiwaywayatda laeng ti surveillance iti international waters iti Pacific idi insayangkat ti Chinese warplanes ti narisgo nga addang.
Kunana a saan laeng daytoy ti umuna a gundaway nga adda ti inaramid ti China kadakuada gapu ta idi Sabado ket kinamat ti Chinese J-15 warplanes manipud iti Shandong ti Japanese P-3C patrol aircraft ti agarup 40 a minuto.
Inpasigurado met ti Japanese government a pagtalinaedenda ti napintas a komunikasion iti China iti aniaman a level ken itultuloyda ti monitorng ti airspace a sakupen ti Japan.
