LAOAG CITY – Naisayangkat ti Kadiwa ng Pangulo iti sangoanan ti Kapitolio Probinsial ti Ilocos Norte kagiddan ti pannakaselebrar ti Labor Day ita nga aldaw, Mayo 1.
Naobseraban nga adu dagiti nagduduma a produkto ti nakapuesto iti aglawlaw a nakipasetan dagiti sumagmamano a Micro, Small and Medium Enterprises no sadino ket ginundawayan metten dagiti umili a gumatang kadagiti nalalaka a presio dagiti produkto kas ti souvenir, palaman, produkto agrikultura dagiti mannalon ken dadduma pay.
Mainaig iti daytoy, kabayatan ti pannakaselebar ti Labor Day ket adda dagiti nasurok a 200 a job seekers ti nagturong iti maysa a dakkel a mall iti ili ti San Nicolas tapno gundawayan ti naisayangkat a Job Fair no sadino adda ti 29 a local companies ti nangidiaya ti nagduduma a trabaho.
Kabayatanna, naammoan a kadagupan kadagiti naruay a nakipaset iti Job Fair ket adda ti 16 ti na-Hired On The Spot apaman a nalpas ti interbyu dagitoy kadagiti maseknan a kompania.
