LAOAG CITY – Naisayangkat iti maikatlon a gundaway ita a tawen ti Kadiwa ng Pangulo iti sangoanan ti kapitolio probinsial.
Segun ken ni Engr. Maria Teresa Bacnat, ti Officer In-Charge iti Provincial Agriculture Office, saan laeng a dagiti naggatgatang ti naragsakan iti naminduan wenno maikatlon a daras a pannakaiyuswat ti nasao nga aktibidad iti sangoanan ti kapitolio probinsial ngem uray pay dagiti mannalon a direkta a nangilako kadagiti produktoda kadagiti aggatgatang.
Naammoan nga adu dagiti mannalon a nakipaset iti nasao nga aktibidad gapu ta umad-adu dagiti mangipadpadanon iti opisinada iti kalikagumda a mangilako kadagiti produktoda iti Kadiwa.
Inlawlawagna a kas iti immuna a pannakaiyuswat ti nasao nga aktibidad ket agtultuloy pay ti pannakipartisipar dagiti nagdumaduma nga ahensia ti gobierno kangrunaanna iti National Food Authority, Department of Trade and Industry babaen kadagiti klienteda pakairamanan ti Bureau of Fisheries and Aquatic Resources.
Impatalgedna a ti bagas a lako ti National Food Authority ket adayo a nalaklaka no maidasig kadagiti dadduma a paggatangan agsipud ta magatang laeng daytoy iti duapulo ket lima a pisos iti kada kilo.
Nupay kasta, inannugotna a limitado laeng ti mabalin a gatangen ti tunggal maysa tapno makawaras agsipud ta limitado ti supply.
Kagiddan daytoy, inawis ni Gob. Matthew Marcos Manotoc dagiti umili a manggundaway iti Kadiwa ng Pangulo agsipud ta adayo a nalaklaka ti presyo dagiti magatgatang no maidasig kadagiti dadduma a paggatangan.
Innayonna a babaen iti daytoy ket naan-anay a maipatungpal ti gagem ti Kadiwa a mangtulong kadagiti kakailian.
